انا عاوز اروح ويّاها هناك
يا رب دى فعلآ وحشتنِى
انا واقِف دايمآ فـ الشباك
وبنادى عليها وسمعتنِى
قولتِلها ان اختى بتضرَبنى
واخويا بياخد مصروفى
مش عايزه فـ يوم بس تسيبنى
لو كنتى معانا انتى تشوفى
بيقولوا عليّا انّى صغير
وان انا عيّل لسه فـ كى جى
وان الدنيا ساعات تتغيّر
وانّك عمرِك يوم ما هتيجى
بس انا عارِف انّك جايّه
وانا واقِف مستنّى شويه
يمكن واحشِك برضو كلامى
يمكن نفسِك تبقى معايا
وصّل ليها يا رب سلامى
وصل ليها كل حكايه
احكيلها يا رب ان انا شاطر
وان اصحابى ساعات بيغيروا
وانا انا دايما قاعد اذاكر
وانا انا بابا ساعات بدعيله
يفضل جنبى كتير وكتير
وميبعِدش بعيد عن عينى
وانّى تعِبت من التفكير
امتى هروحلِك ولا تجينى
امتى هشوفِك تانى قصادى
وان انا قاعد برضو بنادى
يمكن تسمع صوتى وتيجى
يمكن تعرف انّى واحشها
وان انا قاعد مستنيها
هى الدنيا اللى احنا نعيشها
مش هنكمّل عُمرنا فيها
ليه سبتينى فـ دنيا لوحدى ..
ايوا اخواتى وبابا معايا
بس انا عايزِك تيجى لعندى
وانا هحكيلِك كل حكايه
وانّى واحشنى الاكل بتاعِك
اصلآ اختى بتعمل اكل
بس حقيقى عديم الشكل
باكل منّه ساعات وافتكرك
بس اشتقت حقيقى لاكلك
وان اخويا بيجى يبوسنى
قبل ما انام ويقولّى حكايه
بس كلامِك برضو ناقصنى
ايوا وناقِص تبقى معايا
وان انا بابا بشوفه بيتعب
باخد منّه انا كل فلوسه
باجى انا جنبه ساعات وبنلعب
واما نخلص بجرى وابوسه
همّ حياتى وكل ما ليّا
لازم اشيلهُم جوه عنيّآ
بس ناقصنى اكيد حنيّه
منّك انتى يا احلى هديّه
مهما اتأخر بُعدِك جايّه
وانا واقف مستنّى شويّه
Post a Comment