- طيب موضوع القصيده النهارده سؤال صغير ^^
- هو ممكن اتنين بيحبوا بعض يرجعوا اصحاب تانى ؟؟
- كل واحد بيشوف الموضوع من وجهة نظره وانا شايفه ان الشاى بلبن مينفعش يرجع شاى ساده زى ما بيقولوا وان الصحوبيه ممكن تتحول لحب فى بعض الاحيان لكن الحب عمره ما يرجع صحوبيه :)
- طيب سؤال تانى ....
- ايه اللى يخلى الحب ممكن يرجع صحوبيه تانى ...
- حاجات كتير ... اهمهم الظروف الاجتماعيه اللى فيها الشباب .. البنت والولد يفضلوا يحبوا فى بعض سنين ومع اول عريس كويس وجاهز يجيلها طبعا مش هتقدر تقول لاهلها لا
- والولد ساعتها بيبعد ويقولها اعتبرينا صحاب
- قصه بتتكرر يوميا وللاسف القلوب المكسوره دى مفيش حاجه بتعالجها وبتفضل تتالم كل يوم
- ونظره الولد للبنت عمرها ما هتتحول لصداقه بس للاسف مش هيبقى ليه مكان فى حياتها ولو حتى صديق
- ...... ربنا يفرح قلب كل اتنين بيحبوا بعض ويجمعهم بالحلال
- ودى قصيده بقول بتكلم فيها عن الموضوع ده :) ♥
- اتمنى تعجبكوا ^^
متقولش اصحاب ..
ولا حتّى اخوات
الكلمه بتوجَع اوى بالذات ...
لو بعد القلب ما دقّ وداب
الحُب هيرجَع صحوبيه
متقولش الشقه وعربيّه .. والشبكه ومهر
وانا هعمل كل اللى عليّا .. وابقالِك ضهر
هبقالِك اخ فـ عِز الخوف
تتحامِى فـ قلبُه اللى باقيلِك
وبرغم البُعد واى ظروف
فهصلّى الفجر وهدعيلِك
انآ عارِف انّ الحٌب عذاب ..ونصيب مكتوب
انا وانتى هنفضَل برضو اصحاب .. جوانا ذنوب
الذنب اللى انا عايش بيه
القلب اللى انا ساكِن فيه
بقا ليّا غريب
مش عارِف امسِك فـ ايديكى
ولا قادِر حتّى اكفيكى
فانا قولت نصيب
لو هفضَل جنبِك فانا ظالمِك
لو حتّى الذنب مهوش ذنبك
يا حبيبتى خلاص
انا بكتِب مشهد لنهآيه
هتعيشى معايا وجوايا
على اى اساس
وهشوفِك وبعين مكسوره
مع واحد بيقولوا عريسِك
بتدارى دموعِك فـ الصوره
وتلمّى الباقى فـ احاسيسِك
وانا واقِف مستنّى بعيد
القلب بينبض دقاته
ممزوجه بصوت التنهيد
انآ آسف لو هُنتى عليّا
وانآ آسف لو سيبت ايديكى
الحُزن الساكِن فـ ملامحِك
والجرح بيلمع فـ عنيكى
انآ قادِر جدآ اداويكى ..مش وقت عتاب
بعيونِك ولا حتّى بقلبِك .. وكفايه عذاب
انا اصلا فرحان وانا جنبِك ..لو حتّى اصحاب
انا اصلا فرحان وانا جنبِك ..لو حتّى اصحاب
#متقولش_اصحاب
#Eman_Tarek
Post a Comment